ربما الماء يروب ،
ربما الزيت يذوب،
ربما يحمل ماء في ثقوب ،
ربما الزاني يتوب ،
ربما تطلع شمس الضحى من صوب الغروب ،
ربما يبرأ شيطان ، فيعفو عنه غفار الذنوب،
.إنما لايبرأ الحكام في كل بلاد العرب من ذنب الشعوب

(شركة مصرية مساهمة بأموال البلد وأموال الشعب من الغلابة والفقراء)

لسه البلاد العربية لم يحكمها ولد راضع من أمه بيحبها ويعمل لها بإخلاص كل الذين حكموها ...للأسف ..راضعين صناعي ... ولائهم لنيدو....!

هذه المدونة تهتم بحقوق الإنسان ... أي إنسان ..

إعادة بث مبارة …!

كتبهاهيثم ابوخليل ، في 22 يونيو 2009 الساعة: 09:00 ص

إعادة بث …. مبارة …!

كتبت في المقال السابق عبارة … لم أكن أتخيل انها ستصيب كبد الحقيقة هذه الإصابة …!

فقد كتبت :

(( إبتعد النظام المصري بحزبه اللعين وبأسطوله الإداري الفاسد عن المنتخب قليلاً …
فحقق إنجازاً …
لكنه لن يستمر للأسف لأن الله لا يصلح عمل المفسدين الذين يقتلون كل شيء جميل في بلادنا))

وللأسف نال الفريق المصري هزيمة مذلة من الفريق الأمريكي لا تحسبوا الهزيمة من امريكا في كرة القدم شر … أفضل شيء أن نفوق من البنج ونعرف حالتنا علشان نتعالج …العلاج بتر الفساد والفهلوة والظلم كده ممكن الشعب يعيش سعيد

وعليه اعيد اليوم نشر مقال كتبته من عام :

تفتق ذهن أحد رؤساء التحرير الموالين للنظام المصري لفكرة جهنمية يستطيع بها أن يمرر بها السيد جمال مبارك إبن الرئيس مبارك إلي قلوب الشعب المصري مرور السهم من الرمية مما يؤهله لأن يقبل الشعب عليه كما يقبل علي طبق الفول بزيت التموين بدل من أن يقبله كشربة زيت الخروع …مما يسهل عملية التوريث المتعسره لعرش مصر …!!

فعندما شاهد الدورة الرمضانية التي إشترك فيها نجلي الرئيس بفريق إسمه الصقور وحصل فيها علي المركز الثالث بعد تغلبه علي فريق فالنسيا الأسباني ….. هداه شيطانه الوطني إلي إستغلال حب الشعب المصري للكورة ونجوم الكورة وتعصبه لهم …في إقامة مبارة كرة قدم ودية بين فريق الصقور وفريق من عامة الشعب يضم لاعبين من أفقر المناطق الشعبية في مصر مع ترتيب بعض المواقف المعدة سلفاً حتي تؤدي المبارة الغرض منها في تلاحم إبن الرئيس مع أفراد الشعب الكادحين ويحصل فيها نجل الرئيس علي كأس المبارة الودية وعليها مصر فوق البيعة …!!

جلس صاحبنا في فراندة شقته المليونية التي تطل علي النيل في أرقي مناطق القاهرة والتي إستطاع أن يوفر ثمنها من نسبته في الإعلانات والعمولات و(الحبشتكانات) في فترة لم تتجاوز عدة شهور ….

وبدء يتخيل وقائع المبارة وصوت المعلق يجلل فيها وهو يقول:

سيداتي سادتي اليوم عيد لمصرنا الحبيبة ولحظة تاريخية فارقة …أن يلعب فريق الصقور …فريق الرجال …. نعم هم رجال مصر …هم أمل مصر …نعم يا جمال بيه …نعم يا علاء بيه … نعم لفريق الصقور وهو يلعب مع فريق من طينة هذه الأرض ومن طمي نيلها الخالد …فريق الجرابيع الفريق الصبور المهاود …لو أرادنا أن نتعرف علي أسماء اللاعبين في الفريقين …طبعاً أسماء فريق الصقور في غني عن التعريف فهي في قلوبنا قبل أن تكون في عقولنا أما فريق الجرابيع فأسماء اللاعبين الظاهرين أمامي الآن .. قوشه ….حمامه …. تيتو …. التوربيني …. كماشه …وأنا شايف جمال بيه بيقول حاجه لعلاء بيه … أكيد بيقول له هي دي مصر يا علاء تلاحم لاعبين الشعب الواحد ….

بدأـ المباره ويسلااااااااام علي تحركات جمال بيه في الملعب قاريه وفهمه كأنه صفحة نت ….زمان كنا بنقول كأنه كتاب لكن جمال بيه ومع التقدم وفكره كله بالكومبيوتر ….. الله عليه …شاط شوطه جامده عاليه فوووق

فوووق…. زي ما نفسه يرفع مصر لفوق بالضبط …!!

وصلت للمدرجات عند الجمهور… حتي في شوطته مش ناسي الجمهور وبيعمل تواصل معهم …

لا بقي ….علاء بيه دخل عليه تيتو جامد وقعه … إخص عليك يا تيتو مش ده إللي متفقين عليه ….قصدي مش دي طريقة لعب …جمال بيه جري يشوف علاء بيه والخضّه باينه علي وشه وسمعه إتنرفز علي تيتو …. وبيقول له فاكر نفسك أحمد السقا ياروح أمك …!!

مش تحاسب علي علاء بيه ..حسابنا أخر الماتش… أنا حخليهم يعملوك تيتو ( الكبير ) بعد الماتش …

الوضوع تطور … معذور جمال بيه … بيدافع عن أخوه …نزل مسئول كبير قوي وقرب لجمال بيه وسامعه بيقوله في إيه يا جيمي حتبوظ المهرجان إمسك أعصابك …صوت جمال بيه إرتفع وقال :

تيتو إيه وحمامة بلاش قلة حيا …!!

إحنا إتفقنا إحنا إللي نعمل الفاول وأنزل أوطي عليهم وأبوسهم علشان أبين حنيتي للجمهور مش ننضرب من الجرابيع دول …؟؟

المسئول الكبير قوي رد وقال بقلك إيه إعمل زي ما بتقول ماريا :

( إلعب … إلعب ) وبلاش وجع دماغ ما حدش بياكلها بالساهل …

ما إنت شايف ساعات في الجولات بتاعتي ببوس مخبرين مقشفين وبشرب معاهم كمان شاي ….

جمال بيه نظر للمسئول الكبير قوي و أمر بإستئناف اللعب ….

ياااااااااه تاني فاول ومع مين …مع جمال بيه .. وكماشه هو إللي عمل الفاول معاه … سامع جمال بيه بيقوله مش تحاسب يا لوح … كماشه ضحك ورد عليه … لوح سويدي ولا زان يا باشا …!!

الحكم حاسبها ضربة جزاء رغم إن الفاول كان في نصف الملعب … تقدم جمال بيه يشوط ضربة الجزاء …. الله … الله … إيه الحلاوه دي …. ولا الضربة الجوية …فكره رائعه حلوه حلوه شوفوا الفكر الجديد … ملعوبه ملعوبه … بس طلعت بره ..!!!!

يا سلاااااام….. جمال بيه ما رضيش يدخلها جون علشان ما يتقالش الصقور بتكسب بالساهل لازم يكون الفوز بالعمل والجهد …

يا سلام عليك يا جمال بيه …صقر ولا صقر قريش … صقر رسمي … إحنا عايزين نرجع الصقر تاني … ختم الصقر أجمل مش يقولك ختم النسر …!!

لا لا مش معقول … كماشه عمل فاول تاني مع جمال بيه …الغريب إن الحكم ما حسبهاش حاجه …جمال بيه وقف المباره وأمر الحكم بطرد كماشه …الحكم طلع الكارت الأحمر وطرد كماشه …. حد يسألني جمال بيه طرد كماشه ليه …؟؟

..أقوله خايف عليه ..عايزه يروح لأمه ولعياله بدل من إللي حيحصله بعد الماتش وإنه صدق نفسه ولعب بجد ….. فعلاً عظيم يا جمال بيه ….

عند هذا الحد من المباره فاق رئيس التحرير إياه من تخيلاته وأيقن أن المبارة ستأتي بنتيجة عكسية وحتبقي فضيحة بجلاجل وممكن يطير هو فيها لأنه صاحب هذه الفكرة … شويه وقال وجدتها …. مش لازم يكونوا لعيبه بجد ومن مناطق شعبية …ممكن نجيب كومبارس من إللي بنملأ بيهم المؤتمرات واللقاءات ومع حبة مكياج ممكن يقوموا بالدور تمام …

وبدل ما يعملوا فاولات ….ممكن جمال بيه يعمل معاهم فاولات وأول ما جمال بيه يوقع واحد فيهم … يقوم إللي وقع بسرعه ويرقص ويبوسه ويقول ضربك يا جمال بيه وفاولك شرف ووسام علي رجل كل مصري …..ولما جمال بيه يدخل جون …. يقوم الفريق المهزوم كله يسجد شكراً لله إن جمال بيه هو إللي دخل الجون ويقوموا يهتفوا ويقولوا جونك في قلب كل مصري … وزياده في الإثاره ممكن نخلي المعلق يعيط … ويقول هيه دي مصر … 7000 سنه حضاره شفتم التحضر … أول مره أشوف فيها فريق يتهزم ويفرح كده ….

مش بقلكم …..هي دي مصر يا هبله … قصدي يا عبله … !!!

أضف الى مفضلتك